Letzt Joor in uns Gemeen
Leev Gemeen,
Letzt Joor weern wi nett in de tweede Lockdown, aber wi kunnen trotzdem över vööl neeije Saaken in uns Gemeen vertellen, de ook dör Corona komen sünd. Wi sünd Corona immer noch nich quiit woorn, aber wi hebben weer heel foken uns Tuun nutzt un in buten Kaark fiert. Heiligabend weer dat ook weer so, dat de Krippenspöölen in´t buten weern. An disse Stee besten Dank an all de, de dor een büült Arbeid mit hebben!
Wi sünd anfangen in dat Joor 2021 mit een vakanten Pastorenstee, vööl Sörgen wegen Corona, un mit Glocken, de dat ganz nöödig haarn mol neeie Klöppels to kriegen.
Allmanwech weern de Werte in´t Landkreis Leer in´t Vöörjoor so hoch, dat Kaark utfallen muss. Wi hebben in de Tied Gottesdienste upnomen und Lüü kunnen de up uns Internet-Siet oder över´t Abspielgerät anhörn. Dat is ganz good annomen woorn. Man wi weern doch heel blied, as wi Ostern und in Mai Kaark maken kunnen un de Lü ook komen düssen! För de Gottesdienste in Tuun kunnen wi denn noch neije Lautsprechers kriegen, de van de Innovationsfonds van´t Kaarkenkreis mit betaalt woorn sünd. Maakt van Klang woll watt ut!
Woor wi nett bi´t Geld sünd: in Sömmer kunnen wi endlich neeije Klöppels för uns Glocken bestellen, un dat Heelmaken van de Läutemaschiin van´d tweede Glocke beupdragen. Geld haarn wi ja 2020 sammelt un in´t Juni weer dat denn endlich genug. Wuur ook tied – denn de Rohstoff-Priesen wuurn all dürde un wi wullen ja nich noch mehr Geld as wi haarn dorför utgeben! In´t August kunnen denn ook de Arbeiden an Putz un lüttje anner Steeden in´t Kaark klaarmaakt woordn. Nu sücht dat hier weer wat beeter ut und endlich endlich köönen wi to Festdaagen weer all dree Glocken schlaan laaten! Wat n wunnerbooren Klang! För de allgemeine Arbeid in´t Gemeen sünd gaud 2000 Euro freiwillige Karkenbidrag tosamen komen.
Wi hebbn disse Joor denn noch een groden Veränderung belevt:
Anke Ferdinand, uns Pfarramtssekretärin, kreeg köört vör Ostern een Anruf, dat wi in´t Sömmer een Person för uns Pastorenstee kriegen sullen. Van´t Kaarkenvörstand hebben wi een lüttje Willkommens-Paket packt und wuurn denn bold darnaa gewohr, dat Frau Taalke van Blumröder to´n 1. September hör Probedienst as Pastorin anfangen dee. An een ganz wunnerboor sünnigen un warmen Dag is se van uns Regionalbischoff Dr. Detlef Klar denn in een festliche Gottesdienst in uns Tuun ordiniert woorn. Wi sünd heel blied, dat Pastorin von Blumröder in Hesel is un hör Ideen un hör Arbeid bi uns maakt! Se is wirklich een Gewinn för uns!
Wegen de Pandemie weern in de vergangene anderthalf Joor vööl Saken nich möglich. Man mittlewiiel kann man ook week Dööpen un Trauungen fiern. So sünd in´t Karkenjoor 2020/2021 12 Kinner dööpt woorn. Dree Poorn sünd traut und wi hebbn 20 Konfirmanden Gotts Segen mit up´t Weg geben. Man wi mussen ook Abschied nehmen van 37 Minschen ut disse Gemeen, dorvan sünd 31 Minschen bi uns up Karkhoff bisett woorn. Wi denken dorbi ook an Pastor in Ruh Hermann Wolthoff. He hett van 1974 bit 1989 in Hesel as Pastoor west un is vööl Minschen noch in gode Erinnerung. In November 2021 is he mit 94 Joor stüürben.
Nu laat uns aber man nah vöörn kieken. Wi hopen up dat neeije Joor – 2022 – dat wi nich mehr so vööl för uns wesen mutten, man mehr Minschen hier in uns Gemeen und ook woranners treffen könnt, un dat wi mit Vertrauen up Gott wieder good leben könnt.
Besten Dank!
